Setningarhátíð Hjólað í vinnuna 2024 fór fram í morgun á veitingahúsinu Á Bístró í Elliðaárdal. Á dagskrá voru hressileg hvatningarávörp góðra gesta.
Þórey Edda Elísdóttir, 1. varaforseti ÍSÍ bauð gesti velkomna og sagði stuttlega frá verkefninu og þróun þess þau rúmu 20 ár sem það hefur verið í gangi. Að því loknu tóku Willum Þór Þórsson, heilbrigðisráðherra, Einar Þorsteinsson, borgarstjóri Reykjavíkur, Alma Möller, landlæknir, Sigrún Ágústsdóttir, forstjóri Umhverfisstofnunar og Bjartur Guðmundsson, markþjálfi og peppari, til máls. Öll voru þau sammála um mikilvægi verkefnisins og hvöttu landsmenn til að velja þennan umhverfisvæna, hagkvæma og heilsusamlega ferðamáta.

Willum Þór Þórsson, heilbrigðisráðherra, talaði um hvað virkur ferðamáti eins og hjólreiðar væri nauðsynlegur lífstíll sem vinnur gegn loftlagsvánni. Hjólreiðar séu einnig frábær hreyfing fyrir líkamlega og andlega heilsu og tækifæri til að efla forvarnir. Hjólað í vinnuna og önnur almenningsíþróttaverkefni séu ómælanleg verðmæti í forvörnum og góð fyrir heilbrigðiskerfið.

Alma Möller, landlæknir. minnti fólk á það hvað hreyfing hefur góð áhrif á kvíða og þunglyndi og svefnin verður betri. Ef fullorðnir hreyfa sig í 30 mínútur á dag geti það dregið úr ýmsum sjúkdómum, eins og hjarta- og æðasjúkdómum og einhverjum tegundum af krabbameini. Að temja sér virkan ferðamáta er bæði gott fyrir heilsu og umhverfið. Skv. tölfræði embætti landlæknis eru um 17% íbúa á Íslandi að nota virkan ferðamáta, sem klárlega er hægt að bæta.

Einar Þorsteinsson, borgarstjóri í Reykjavík, segir svona verkefni skipta borgina miklu máli. Borgin sé búin að leggja mikla vinnu í betri hjólastíga sem leiði til aukinnar og betri hjólreiðamenningar. Í dag eru 40km af hjólastígum og hjólaumferðin stöðugt að aukast frá ári til árs og það skipti máli fyrir lýðheilsu. Það eru hagsmunir borgarinnar að halda fólki heilbrigðu og vildi hann leggja áherslu á að hjólreiðar væru fyrir alla.

Sigrún Ágústsdóttir, forstjóri Umhverfisstofnunar, vildi koma á framfæri að hjólreiðafólk veldi nærandi og grænar hjólaleiðir og stíga til og frá vinnu og minnti á að það eru nokkur friðlýst svæði í og kringum höfuðborgina. Hún var virkilega ánægð með átakið Hjólað í vinnuna því það væri góður grunnur til að byrja og halda svo áfram að hjóla inn í sumarið.

Bjartur Guðmundsson, markþjálfi og peppari, hvatti gesti áfram til að hjóla og ræddi hvað hugarfarið og líðan fólks getur verið stór hindrun í hreyfingu og í því að nota virkan ferðamáta. Við erum stundum alltof góð að finna afsakanir, en það sé nauðsynlegt að setja kassann út, temja sér jákvætt hugarfar og nota virkan ferðamáta ef það er hægt, því það borgi sig alltaf. 

Þegar allir höfðu lokið máli var farið út og átakið hjólað af stað.

ÍSÍ þakkar gestum og þátttakendum fyrir komuna og segjum Hjólað í vinnuna hafið í 22. skiptið! Með góðu gengi og ósk um að farið sé varlega í umferðinni!

Hér má sjá fleiri myndir frá setningunni í morgun.