Starfsmaður Bogfimisambands Íslands (BFSÍ), Valgerður E. Hjaltested, er nýlega komin heim eftir rúmlega 6 vikna námskeið í afreksíþróttamiðstöð Alþjóðabogfimisambandsins (World Archery Excellence Centre – WAEC) í Ólympíuborginni Lausanne í Sviss. Á námskeiðinu lauk Valgerður hæsta þjálfarastigi hjá heimssambandinu (WA) og er hún annar íslenski þjálfarinn sem nær þessari gráðu í bogfimi. 

Valgerður var ánægð með dvölina og námskeiðið og sagðist hafa haft bæði gagn og gaman að henni í Lausanne, en ekki síst af þeim tengslum sem hún myndaði við fólk alls staðar að úr heiminum. Valgerður var í hópi lengra kominna þjálfara í greininni frá Brasilíu, Kyrgystan, Bútan og Kýpur.

Verkefnið var fjármagnað með styrk frá Ólympíusamhjálpinni (Olympic Solidarity).

Nánari frétt er að finna á heimasíðu BFSÍ.