Hlutirnir gerast hratt þessa dagana í hópi afrekíþróttafólks Íþróttasambands fatlaðra. Búið var að tilkynna þátttöku fjögurra keppenda á Paralympics hér á fréttasíðu ÍSÍ í júnímánuði og nú hafa tveir einstaklingar til viðbótar náð inn á leikana.

Sundmaðurinn Róbert Ísak Jónsson mun keppa í þremur greinum á Paralympics, það er 100 m flugsundi, 200 m fjórsundi og 100 m bringusundi og verður Róbert Ísak fyrstur Íslendinga af stað á mótinu. Hann hefur keppni á fyrsta keppnisdegi eða þann 25. ágúst, degi eftir setningarhátíð leikanna. Alþjóðahjólreiðasambandið tilkynnti svo nýverið að Arna Sigríður Albertsdóttir hafi hlotið boðssæti í handahjólreiðum og verður Arna Sigríður þar með fyrst íslenskra kvenna til að keppa í hjólreiðum á Paralympics.

Fyrir höfðu sundfólkið Már Gunnarsson og Thelma Björg Björnsdóttir og frjálsíþróttafólkið Bergrún Ósk Aðalsteinsdóttir og Patrekur Andrés Axelsson tryggt sér þátttökurétt á leikunum.

Glæsilegur hópur sem verður spennandi að fylgjast með á Paralympics. ÍSÍ óskar þeim öllum til hamingju með þátttökuréttinn!