Forseti EOC látinn
![](/library/Myndir/Frettamyndir/janec.jpg?proc=400x400)
Forseti Evrópusambands Ólympíunefnda (EOC), Janez Kocijančič er látinn eftir snarpa baráttu við krabbamein, 78 ára að aldri. Hann lætur eftir sig eiginkonu og tvö börn.
Janez var kjörinn forseti EOC í nóvember 2017 eftir að hafa gegnt embætti varaforseta um fjögurra ára skeið. Hann var meðlimur í stjórn EOC frá árinu 2005, var formaður Ólympíunefndar Slóveníu 1991-2014, formaður Skíðasambands Slóveníu 1974-1984, formaður Skíðasambands Júgóslavíu 1984-1988 og varaforseti Alþjóðaskíðasambandsins frá árinu 2010. Janez var einnig varaforseti Heimssambands Ólympíunefnda (ANOC), fyrir Evrópu. Janez var lögfræðingur og átti farsælan feril bæði í viðskiptum og stjórnmálum. Hann var meðal annars þingmaður í slóvenska þinginu árin 1982-1987.
Líney Rut Halldórsdóttir framkvæmdastjóri ÍSÍ, sem situr í stjórn EOC, minnist forsetans með hlýju og segir hann hafa unnið einstaklega gott og mikið starf í þágu íþrótta í Evrópu:
„Janez vann einstaklega vel að hagsmunum álfunnar, meðal annars á vettvangi Heimssambands Ólympíunefnda (ANOC) og vildi framgang íþrótta í Evrópu sem mestan. Janez var virtur í íþróttasamfélaginu enda með einstakan leiðtogaferil að baki, bæði í heimalandi sínu Slóveníu sem og í alþjóðasamböndum íþrótta. Hans verður saknað af samferðarfólki hans um alla Evrópu.“