Gunnar Valgeirsson, prófessor við California State University, fjallar um skipulag og áhrif íþrótta í Bandaríkjunum í erindi í Háskóla Íslands föstudaginn 1. júní nk. Erindið verður í stofu 101 í Odda og stendur frá kl. 12-13.15. 

Gunnar hefur búið í Bandaríkjunum í þrjá áratugi og kennt félagsfræði íþrótta í tveimur bandarískum háskólum frá árinu 1991. Í fyrirlestrinum mun hann kynna stuttlega sögu og útbreiðslu keppnisíþrótta og ræða uppbyggingu barna-, gagnfræðaskóla- og háskólaíþrótta. Um leið verður rýnt í hvernig íþróttaþátttakan hefur áhrif á líf einstaklinga samanborið við þá sem ekki taka þátt í keppnisíþróttum, t.d. hvað varðar félagslega lagskiptingu. Skipulag og efnahagsgrundvöllur atvinnuíþrótta verður ræddur svo og ahrif stjórnmála og fjölmiðla á þær. Loks mun verða rýnt í áhrif núverandi þjóðfélagsbreytinga, s.s. heimsvæðingar, á keppnisíþróttir í Bandaríkjunum.

Fyrirlesturinn er haldinn á vegum námsbrautar í félagsfræði og Félagsfræðingafélags Íslands og er öllum opinn.