Mikil íþróttaveisla stendur yfir í Finnlandi þessa dagana. Landslið karla í körfuknattleik leikur á lokamóti EuroBasket 2017 og spilar leik bæði á laugardag og sunnudag. Karlalandsliðið í knattspyrnu á leik við Finna á laugardaginn í Tampere í undankeppni HM  og íslenskir kylfingar keppa á opna finnska meistaramótinu í golfi sem er hluti af Nordic golf mótaröðinni.

Lárus L. Blöndal forseti ÍSÍ, Gunnar Bragason gjaldkeri og Líney Rut Halldórsdóttir framkvæmdastjóri eru stödd í Finnlandi til að fylgjast með íslensku afreksíþróttafólki og leggja sitt af mörkum til stuðnings íþróttafólkinu. Þau kíktu á íslensku kylfingana í dag og er þessi mynd tekin við það tækifæri. Með Lárusi, Gunnari og Líneyju Rut eru Ólafur Björn Loftsson og Guðmundur Ágúst Kristjánsson. Alls taka fimm íslenskir kylfingar þátt í mótinu en það eru, auk Guðmundar Ágústs og Ólafs Björns þeir Andri Þór Björnsson, Axel Bóasson og Haraldur Franklín Magnús.

Á morgun verður stór dagur en þá verður fyrst leikur hjá landsliðinu í körfuknattleik í Helsinki og í kjölfarið leikur Finna og Íslendinga í knattspyrnu. Einnig verður þá leikinn lokahringurinn á opna finnska meistaramótinu í golfi. Það verður því í nógu að snúast hjá íslenskum stuðningsmönnum við að fylgjast með spennandi viðburðum í íslensku íþróttalífi.