Þór Ísfeld Vilhjálmsson fyrrverandi formaður Íþróttabandalags Vestmannaeyja var sæmdur Heiðurskrossi ÍSÍ á uppskeruhátíð ÍBV 18. janúar síðastliðinn í Vestmannaeyjum fyrir langvarandi og góð störf í þágu íþróttahreyfingarinnar. Það var Ingibjörg Bergrós Jóhannesdóttir úr framkvæmdastjórn ÍSÍ sem afhenti Þór heiðursviðurkenninguna fyrir hönd ÍSÍ. Þór hefur sinnt forystustörfum í íþróttahreyfingunni í áratugi, lengst af sem formaður Íþróttabandalags Vestmanneyja. Hann hefur átt sæti í vinnuhópi ÍSÍ um Ferðasjóð íþróttafélaga frá upphafi sjóðsins og sinnt þar mikilvægu starfi í þágu hreyfingarinnar á landsvísu, svo fátt eitt sé nefnt.
Við sama tækifæri var Gísli Valtýsson sæmdur Gullmerki ÍSÍ en Gísli á einnig að baki langt og farsælt starf í þágu íþrótta.

ÍSÍ óskar þeim félögum Þór og Gísla innilega til hamingju með heiðursviðurkenningarnar.