Haustfjarnám allra stiga í þjálfaramenntun ÍSÍ hefst 29. september.
29.08.2014Haustönn hins vinsæla fjarnáms ÍSÍ í þjálfaramenntun 1. 2. og 3. stigs hefst mánudaginn 29. september næstkomandi. Námið er svokallaður almennur hluti þekkingar íþróttaþjálfara og gildir jafnt fyrir allar íþróttagreinar. Hinn hluta námsins sækja þjálfarar til viðkomandi sérsambanda (-nefnda) ÍSÍ. Nám 1. stigs tekur 8 vikur en nám á 2. og 3. stigi tekur 5 vikur. Allir sem lokið hafa grunnskólaprófi hafa rétt til þátttöku á 1. stigi.
Skráning er á namskeid@isi.is og/eða í síma 514-4000 og þarf skráningu að vera lokið fyrir föstudaginn 26. september. Taka þarf fram fullt nafn, heimilisfang, kennitölu, netfang, símanúmer og að sjálfsögðu á hvaða stig verið er að skrá.
Nemendur skila verkefnum í hverri viku námsins og taka auk þess nokkur krossapróf. Þátttökugjald á 1. stig er kr. 25.000.- og eru þá öll námskeiðsgögn innifalin í verðinu. Þátttökugjald 2. og 3. stigs er kr. 18.000 og nýtast námskeiðsgögnin frá 1. stigi áfram á þeim stigum.
Námið veitir réttindi til íþróttaþjálfunar og jafnframt réttindi til frekara náms í íþróttaþjálfun. 1. stig ÍSÍ jafngildir ÍÞF 1024 í framhaldsskólum og er það metið í báðar áttir. Allir þátttakendur sem ljúka námi fá send þjálfaraskírteini því til staðfestingar og inn á það skírteini eiga svo öll námskeið að fara, líka það nám sem sótt er til sérsambanda (-nefnda) ÍSÍ.
Allar frekari upplýsingar um þjálfaramenntun ÍSÍ gefur Viðar Sigurjónsson, skrifstofustjóri ÍSÍ á Akureyri, í síma 514-4000 eða 460-1467 og á vidar@isi.is.