Á Vetrarólympíuleikunum í Sochi eru samankomnir allir helstu forsvarsmenn íþrótta- og ólympíuhreyfingarinnar á heimsvísu.

Dvöl þeirra á leikunum er meðal annars notuð til þess að funda, mynda og styrkja tengslanet og ræða ýmis hagsmunamál hreyfingarinnar.  ÍSÍ tekur alls þátt í 10 ólympískum verkefnum á hverri ólympíuöðu og sterkt tengslanet stjórnar og starfsfólks ÍSÍ hefur oft komið sér vel þegar á hefur reynt.

Forseti ÍSÍ nýtti tímann vel þá daga sem hann var í Sochi og hitti marga af helstu íþróttaleiðtogum heims. Á meðfylgjandi mynd eru Lárus L. Blöndal forseti ÍSÍ  og Líney Rut Halldórsdóttir framkvæmdastjóri ÍSÍ með nýkjörnum forseta Alþjóðaólympíunefndarinnar, Thomas Bach, sem er á sínum fyrstu Ólympíuleikum eftir að hann tók við embætti forseta IOC.