Nú fer að líða að lokum Vetrarólympíumóts fatlaðra í Sochi, en Ísland á tvo keppendur á mótinu sem keppa í alpagreinum skíðaíþrótta.

Þau Erna Friðriksdóttir og Jóhann Þór Hólmgrímsson keppa bæði í svigi og stórsvigi á mótinu, og í báðum tilfellum keppa þau í sitjandi flokki.  Hafa þau bæði lokið keppni í svigi og í dag keppti Jóhann í stórsvigi og er meðfylgjandi mynd frá keppni dagsins.  Jóhann Þór lauk keppni í 23. sæti en hann var að keppa á sínu fyrsta Ólympíumóti.

Erna keppir á morgun, sunnudag, í stórsvigi og jafnframt um að ræða síðasta keppnisdag mótsins.  Um kvöldið fer svo fram lokahátíðin og má búast við að hún verði jafn glæsileg og setningarhátíð mótsins.

Íþróttasamband fatlaðra hefur staðið sig vel hvað varðar umfjöllun frá mótinu og má finna fréttir og viðtöl á heimasíðu sambandsins www.ifsport.is 

Ríkisútvarpið (www.ruv.is) hefur sýnt frá mótinu og hefur íþróttarás þeirra verið nýtt að mestu til þeirra útsendinga.  Lokahátíð mótsins verður þannig sýnd beint auk keppni Íslendinga.

Þá er einnig hægt að fylgjast með beinum útsendingum frá mótinu á www.paralympicsport.tv

Þess má geta að keppni í alpagreinum á Ólympíumóti fatlaðra fer fram í sömu brekkum og keppni í alpagreinum á Ólympíuleikunum.  Það er ótrúlegt að sjá getu þessara einstaklinga sem skíða þar í erfiðum aðstæðum með fjölbreytilega fötlun, s.s. sjónskerðingu eða án einstakra útlima.